Kantautorea

Anoetako bakarlari gazteak Martxaundi 4 Tolosaldeko talde eta abeslarien bilduman izan zuen bere lehen kantua grabatzeko aukera. Aurretik emanak zituen bere lehen kontzertuetan nahiz Martxaundiko agerraldi harekin harritu eta liluratu bagintuen, erakutsi dituen talentua eta ausardia, aurrekari hurbilik gabeko kantukeraren isla baino ez dira. Sei kantu biltzen dituen lana kaleratu du Bonberenea Ekintzak zigiluak, azken urteetan proiektu eta ekimen ezberdinak bultzatzeko hartu duen dinamika biziarekin jarraituz. Datozen hilabeteetan hainbat emanaldi egingo ditu Jonek, kantu berriak jendaurrean aurkezteko.