CIES erakundeak Nafarroako Gobernurako egindako ikerketaren arabera, Baztan-Bortziriak-Malerrekako Ttipi-Ttapa hamaboskariak 29.000 irakurle zituen 2011n, aurrekoan baino 4.000 gehiago. Horrek esan nahi du Ttipi-Ttapa dela Nafarroan argitaratzen diren euskarazko argitalpenen artean irakurriena. Sakanako Guaixe astekariaren datuak ere oso onak dira: batez beste 14.000 irakurle ditu.

Informazio gehiago nahi izanez gero, Ttipi-Ttapak datuen irakurketa zabalgoa ere argitaratu du egunotan.

ATARRABIA, 2012/12/16.- Topagunearen Nafarroako arduraduna, Oskar Zapata, eta BIERRIK Fundazioarena, Ainhoa Urretagoiena, agerraldia egiten ari dira une honetan Nafarroako Parlamentuaren Hezkuntza Batzordearen aurrean, Gobernuak 2012rako aurkeztu duen aurrekontu proiektuan euskara sustatzeko aurreikusitako partidak zuzen ditzala eskatzeko asmoz.

Hori dela eta, datu soziolinguistikoak eskutan hartuta, Topagunearen ordezkariek Nafarroako euskalgintzak garatzen duen lanaren garrantzia azalduko diote Parlamentuari, eta ondorioz ‘konplizitatea eta babesa’ eskatuko diete bertako taldeei, beste batzuetan egin den bezala elkarlanerako prestutasuna adieraziz. Zehazki, sei eskaera egingo dizkiote Parlamentuari:

• 2012. urtean hedabideetan euskara sustatzeko 650.000 euroko partida, Horietako %80 gutxienez banatu dadila euskara hutsez lan egiten duten hedabideen artean.
• Euskarazko hedabideetan Gobernuak publizitatea sartu dezala, hedabide horien sarbide eta banaketa kopuruaren arabera.
• 2102. urtean euskarazko kultur jarduerak sustatzeko 250.000 euroko partida eta hori erabili dadila soziolinguistikaren ikuspegitik lehentasun handiagoa duten lan lerroetan: haur eta gazteen aisialdian, mintzapraktika egitasmoetan, entitateak euskalduntzeko proiektuetan eta kultur produkzio zein programazioan.
• Neurri horiek izan daitezela lehenak euskarazko hedabideak eta erabilera sozio/kulturala sustatzeko lan egiten dugunen egoera egonkortzeko.
• Azaroan salatu genuenez, 2012rako aurrekontu proiektuak murrizketa onartezinak proposatzen ditu euskararekin lotutako partidatan. Hala, urterik onenean 300.000 euro izatera iritsi den euskara hedabideetan sustatzeko partida 2012an ZERO eurokoa izatea nahi du Foru Gobernuak, eta euskarazko kultur jarduerak sustatzekoa, berriz, HAMAR eurokoa.
• Horretarako 2012. urtean Gobernuak jar ditzala mahai gainean egokiak diren markoak eta lankidetza hitzarmen egonkorren bidez jaso ditzala.
Lankidetzarako erabateko prestutasuna azaldu, elkarren eskutik soilik egin ahal izango baitugu aurrera egin.

Zuen interesekoa izan daitekeelakoan, honekin batera erantsi dizuegu agerraldiaren eduki osoa biltzen duen dokumentua:

Agerraldia Nafarroako Parlamentuan, 2011-12-16 (164.38 kB)

TOPAGUNEAk bat egiten du gaurko egunez euskarazko hedabide ez publikoek argitaratu duten idatziarekin. Hona:

Euskarazko hedabideek erakundeen konpromisoa behar dute

Bederatzi hilabete badira euskarazko hedabide ez publikook agerraldi publikoa eta kanpaina bateratua egin genituela, hiru helburu nagusirekin

1. Sektorearen estrategikotasuna eta beharra azpimarratzea. Komunikazioaren eta hizkuntz normalizazioaren ikuspegitik ez ezik, ekonomia ikuspegitik ere estrategikoa eta garrantzia handikoa den sektore bati buruz ari gara hitz egiten.
2. Erakunde publikoei sektorearekiko konpromiso handiagoa eskatzen zitzaien, publizitate-inbertsio, bestelako inbertsio eta laguntza handiagoak, gaurtik bertatik hasita.
3. Horretaz gain, sektoreak egoeraren analisia egin eta analisi horretatik abiatuta ildo nagusiak erakundeekin lantzen hasteko konpromisoa hartu zuen.

2012. urtea ate-joka dugu, eta erakundeetatik sektoreari begira jasotzen ari garen mezuak kezkagarriak dira, ikaratzeko modukoak.

1. 2012rako aurrekontu proposamenean jasota daudenak betetzen badira, Nafarroako Gobernuak euskarazko hedabideentzako zituen diru laguntzak ezerezean dira, 2012ko aurrekontuetatik erabat desagertuko da hedabideetan euskara sustatzeko diru partida. Gainera, 2011ko bigarren epealdiko laguntzak desagertzeko arriskua ere handia da.
2. Eusko Jaurlaritzak aurkeztutako aurrekontuak onartzen badira, erakunde horrek aurten baino 400.000 euro gutxiago bideratuko ditu 2012an hedabideen diru laguntzetara. Urteetan, Eusko Jaurlaritzaren aurrekontu orokorrak goraka joan direnean, euskalgintzara eta euskarazko hedabideetara bideratutako diru sailak ez dira handitu; orain, aurrekontuetan estutasunak sortu direnean, ez dago gupidarik: lehendik estu dabilen sektore bati are kalte handiagoa egiteko aukera zabalduko da.
3. Gipuzkoako Foru Aldundiak 2011ko diru sailari eustea aurreikusi du —aurreko bi urteetan asko jaitsi da diru sail hori, eta ez du handituko—. Bizkaiko Foru Aldundia da 2012rako bere aurrekontuetan diru saila handitzea aurreikusi duen bakarra —47.500 euro gehiago, %12ko igoera—.
4. Eta zer esanik ez Iparralderi buruz, non euskaldun hiztunen galera bizkorra (hizkuntza politika publiko baztertzailearen ondorioz) anbiziorik gabeko hizkuntza politika batekin paraleloan doan. Enpresa pribatuek euskarazko hedabide berriak sortzen dituzten bitartean, laguntza publikoak oraindik geldialdi berean mantentzen dira eta, aldi berean, botere publiko gehienek ez dituzte kontuan hartzen euskarazko hedabideak beren publizitate kanpaina ordainduetan.

Jakitun gara sektorearen etorkizuna gure lanaren baitan dagoela nagusiki. Guk geuk ere aztertu behar ditugula gure indargune eta ahuldadeak, sektorean elkarrekin jardunda errazagoa izango zaigula garai zail honi aurre egitea. Zeregin horretan ari gara hilabete hauetan eta laster batean gure hausnarketa instituzioetako arduradunekin partekatu ahal izango dugu. Baina argi dugu aurrera egiteko ezinbestekoa dugula erakunde publikoen laguntza handiagoa, eta hori ari gara aldarrikatzen une honetan.

Gaur egungo erakunde publikoen dinamikak ez du asko laguntzen bide horretan, eta ezin dugu isilik geratu ikusten dugunean euskarazko hedabideen sektoreak ez duela erakunde publikoen 2012ko aurrekontu proposamenetan behar eta merezi duen trataera jasoko, ustez denen begietara sektore ezinbesteko eta estrategikoa izan arren. Horregatik, erakundeei publikoki eskatzen diegu gaiaren garrantzia kontuan hartzeko eta aurrekontuak ahalik eta gehien egokitzeko, partidak handituz.

--------------------------------------------------

2011ko abenduaren 2an

Euskarazko hedabide ez publikoak