|
Ttipi-Ttapak jaso du Rikardo Arregi Kazetaritza Sarietako Ohorezko Aipamena |
 |
 |
 |
|
Bortziriak-Malerrekako Ttipi-Ttapa komunikazio egitasmoak Ohorezko Aipamena jaso zuen joan den larunbatean Andoainen banatu ziren Rikardo Arregi Kazetaritza Sarien XXI. edizioan. Besteak beste, tokiko hedabideen alorrean aitzindari izatea, etengabeko berrikuntza eta inkonformismoa, eta egoera zailei irtenbidea bilatzeko ekimena nabarmendu zituen epaimahaiak Ohorezko Aipamena Tttipi-Ttapari emateko orduan. Saria Ttipi-Ttapa Fundazioko lehendakariak, Pello Apezetxeak, eta kudeatzaileak, Joxemanuel Irigoienek jaso zuten. Irigoienek nabarmendu zuen sariak "laguntza handia emango diela" aurrera jarraitzeko. Komunikazio proiektuak kolpe latza jaso zuen urte hasieran, arazo ekonomikoek bultzatuta, tokiko telebistetan aitzindaria den Ttipi-Ttapa telebistaren emanaldiak 11 urteren ostean eten behar izan zituenean.
Ezkerretik hasita, beheko ilaran, Gorka Bereziartua, Iñigo Martin
(Kostaldeko Trenaren lan-taldekoa) Olatz Simon, Pello Apezetxea
eta Joxema Irigoien (Ttipi-Ttapa)
Argazkiak.org | Rikardo Arregi kazetaritza sariak © cc-by-sa: sustatu
Â
Ttipi-Ttaparekin batera, ondoko kazetari/egitasmo hauek ere jaso zuten saria:
- Sari Nagusia ETBko Txinako korrespontsalak, Olatz Simonek, jaso zuen.
- Kazetari gaztearen saria, berriz, Gorka Bereziatua, Argiako kazetariak eskuratu zuen.
- Epaimahaiaren Sari Berezia, azkenik, Euskadi Irratiko 'Kostaldeko Trena' irratsaioak lortu zuen.
|
|
Karkara aldizkariak sasoi betean ospatu du 20. urteurrena |
|
|
|
|
 Orio eta Aiako Karkara hamaboskariak 20 urte bete ditu aurten, eta ezin esan adinak kalte egiten dionik. Urteurrenarekin batera, Eusko Jaurlaritzaren laguntzaz AZTIKER enpresaren bidez egin duten irakurleen gaineko azterlanak erakusten duenez, aldizkaria sasoi betean dago eta, Idiazabalgo ALDAIZE, Elgoibarko BARREN, Eibarko ...ETA KITTO! eta Txorierriko AIKOR! aldizkariek bezalaxe, irismen eta onarpen maila ezin hobeak ditu.
Karkarak ekaineko lehen alean, 262.an, argitaratu du azterlanaren emaitzen laburpen txiki bat, hemen behean irakur daitekeena:
Â
|
|
|
Elgoibar eta Mendaron ez dago BARREN astekaria ezagutzen ez duenik |
|
|
|
Iaz Aikor! eta ...eta Kitto! aldizkariek hasitako bideari jarriki, Elgoibarko Izarra kultur elkarteak BARREN astekariari buruzko ikerketa egin du. Batetik, BARREN astekariaren irakurleen perfila ezagutzea zen helburua, eta, bestetik, herritarren iritziak jaso nahi izan ditu elkarteak.
Lan hori egiteko 15.000 euroko diru-laguntza eman dio Eusko Jaurlaritzak elkarteari. Ikerketa lanak hiru zati izan ditu:
- Lehenengoan idatzizko inkestak bidali zituen etxeetara BARRENek (4.500 guztira).
- Bigarrengoan, herriko hainbat eragilerekin hamabost elkarrizketa inguru egin ditu, euren iritzia jasotzeko.
- Hirugarrena, zatirik garrantzitsuena, telefonozko inkestak izan dira. Azken atal hori Aztiker, inkesta soziologikoetan espezializatutako enpresak egin du. Elgoibar eta Mendaroko 725 etxetara deitu du, eta adin eta sexu diferenteetako herritarren iritziak jaso ditu.
Ikerketaren emaitzek berretsi egiten dute iazkoetan nabarmentzen ziren joerak, eta argi erakusten dute euskarazko tokiko prentsak duen irismen eta onarpen zabala. Emaitzen laburpena joan den ostiraleko alean laburbildu dituzte BARREN astekarian, azpian ikus daitekeen gehigarrian. Azterketaren emaitzen txosten osoa ere eskuragarri jarri dute sarean.
|
|
Nafarroako Euskararen Kontseiluak euskarazko hedabideen egoera izan du aztergai |
|
|
|
|
Kezka agertu du Nafarroako Euskararen Kontseiluak euskarazko hedabideek jasaten ari diren egoeraren aurrean. Zenbait batzordekidek egindako eskaerari erantzunez euskarazko hedabideek adostutako agiria aurkeztu eta eztabaidatua izan zen atzo, ekainaren 3an, Iruñean egindako batzarrean. Agiria ez zen bozkatua izan azkenik eta, horren ordez, Euskararen Kontseiluak egoerarekiko kezka adierazi eta gutxienez 2008rako izendatutako aurrekontuaren besteko diru kopurua hedabideen artean banatua izan dadila eskatu zuten Kontseiluko kideek.
Gobernuko ordezkariek euskarazko hedabideekin zabaldutako harremanaren berri eman zioten Kontseiluari, halaber.
Â
Nafarroako hedabideek aurkeztutako agiria
Nafarroako hedabideek lau ataletan banatutako agiria aurkeztu zioten Nafarroako Euskararen Kontseiluari.
 Lehen bi ataletan euskarazko hedabideek Nafar Gobernuari kexa eta larritasuna helarazi diete azken urteotan jasandako egoerarengatik. Gobernuak euskarazko komunikazio publikoari ematen dion tratuagatik atsekabea agertu dute agirian hedabideek, Ttipi-Ttapa telebistaren etena, Xaloa telebistaren egoera ziurgabea, Euskalerria Irratiari lizentziarik ez ematea, euskarazko hedabide publikorik eza, EITBren seinalea hedatzeko trabak eta beste hainbat hedabiderentzat (Berria egunkariari kasu) diru-laguntzarik ez ematea gogora ekarriz. Era berean, azken bi urteetan diru-laguntza deialdiek izan dituzten murrizketa gogorrek hedabideetan izango duten ondorioek kezka nabarmena sortu dutela gogoratu dute hedabideek.
Zenbait eskari eta eskaintza eginez bukatu dute agiria Nafarroako euskarazko hedabideek. Ondoko eskariak egin dituzte:
- 2009. urtean euskarazko hedabideek aurreko urteetan jaso duten diru laguntzaren antzeko kopurua jasotzea.
- Publizitate instituzionala euskarazko hedabideetan ere sartzeko eskaera Nafar Gobernuari.
- Euskalerria Irratiaren egoera erregularizatzea eta emititzeko lizentzia ematea.
- Euskarazko telebistek emititzen segitu dezaten egin beharrekoa egitea.
- Aurten gertatukoa berriro gerta ez dadin pauso zehatzak ematea: euskarazko hedabideen egoera erregularizatzea, egoera egonkortzeko hitzarmen baten bidez.
Horrekin batera, lankidetza eskaintza egin diote euskarazko hedabideetako ordezkariek Nafarroako Gobernuari. Euskararen sustapena oinarri izango duen lankidetza hori euskarazko hedabideen egoera egonkortzera zuzenduko litzateke, eta lankidetza hitzarmen batean gauzatuko litzateke. Lankidetza hitzarmen horrek ondokoak jaso beharko lituzke hedabideotako ordezkarien iritziz:
- Euskarazko hedabideen lanaren aitorpena
- Zeregina duintasunez burutzeko beharren definizioa
- Gobernuaren laguntzaren gutxienekoa
- Laguntzak jasotzeko hedabideek dituzten betebehar eta baldintzak
|
|
